SİZİN SƏYAHƏT BƏLƏDÇİNİZ
+994502033247 Suallarınız üçün daha ətraflı
+994502033247 Suallarınız üçün daha ətraflı
Dili seçin:

Qızıl Qaranohur

Yanvar 31 2020 311 Baxış

Qaranohur gölü İsmayıllı rayonunun Talıstan kəndində yerləşir.

Hər tərəfi müxtəlif növ ağaclardan, giləmeyvələrdən (dadlı olur,ələxsus da böyürtkənlər) və dağlardan  ibarət gözəl mənzərəli yollarla yürüyüb 1520 m hündürlüyə çatdıqdan sonra gözlərinizin önünə o qədər füsünkar bir mənzərə çıxacaq ki, ora qalxarkən ciyərinizi göynədən nəfəs darlığını, yorğunluqdan dizlərinizin sözünüzə baxmayıb tir-tir titrəməsini elə həmin anda unudacaqsınız. Gölətrafı ağacların yarpaqlarının hər birinin fərqli rənglərdə olmağı, Gölün suyunun şəffaflığı və rəngarəng yarpaqlı ağacların əksinin gölə yansıması sizə sehirli dünyadaymışsınız kimi hiss etdirəcək.

Əgər mənim kimi rəngarəngliyi sevən, ürəyi gedən, yıxılıb sürünən (yox,abartmadım) birisinizsə o zaman sizə Qaranohur Gölünə Payızda getməyin ən gözəl fikir olduğunu deyə bilərəm.

O gözəlliyi gedib görə bilmək üçün lazım olacaq əşyalar isə bunlardır :

 

1. Əşyalarınızı daşıya bilmək üçün bel çantası (sukeçirməz olması məqsədə uyğundur)

2. Su, qida (buterbrod,quru meyvələr və s. kimi bel çantanızı ağırlaşdırmayacaq qidalar).

3. Əlavə corab, T-shirt

4. Yürüş çubuqları

5. Hiking  üçün nəzərdə tutulmuş və ya altı sürüşkən olmayan idman ayaqqabıları ( hərgah mən təcrübəsizlikdən altı sürüşkən geyib tur boyu konki üzərindəymişəm  kimi davamlı sürüşürdüm )

6. Yağmurluq.

 

Büdcəyə gəldikdə isə demək istəyirəm ki, qiymət 25-30 AZN arası dəyişir və bu adətən seçdiyiniz turdan asılı olur. Əgər büdcəniz buna uyğun deyilsə, o zaman avtostopla getmək daha məqsədə uyğun olacaqdır.

 

Hə, unutmadan deyim ki, əgər siz də mənim kimi danışmağı və gülməyi, eləcə də canınızı sevən birisinizsə,  Backpack Azerbaijan'ın tur bələdçilərini  seçsəniz peşman olmazsınız.

Onlar nəinki sizin təhlükəsiz şəkildə yüksəkliyə dırmaşmağınıza yardımçı olacaqlar, eyni zamanda  yolculuğunuza rəng qatacaqlar. Oxusanız oxuyacaqlar, oynasanız oynayacaqlar :) Hətta mənzərədən çox yolculuğunuzun rəngarəngliyinə heyran qalacaqsınız deyə bilərəm.

 

Beləliklə hər birinizə hər an gözəl mənzərələrlə qarşılaşmaq diləyilə yolunuz açıq olsun deyirəm! 

Gülər Əkbərli